No BOE do sábado día 19 de setembro publicouse a Lei 3/2020, do 18 de
setembro, de medidas procesuais e organizativas para facer fronte ao COVID-19
no ámbito da Administración de Xustiza.
Entre as medidas organizativas atópanse as seguintes:
·
Celebración de actos procesuais mediante
presenza telemática.
Ata o 20 de xuño de 2021 inclusive, constituído o xulgado ou tribunal na
súa sede, os actos de xuízo, comparecencias, declaracións e vistas e, en xeral,
todos os actos procesuais, realizaranse preferentemente mediante presenza
telemática, sempre que os xulgados, tribunais e fiscalías teñan á súa
disposición os medios técnicos necesarios para iso.
·
Acceso ás salas de vistas.
Co fin de garantir a protección da saúde das persoas, ata o 20 de xuño
de 2021 inclusive, o órgano xudicial ordenará, en atención ás características
das salas de vistas, o acceso do público a todas as actuacións orais. Cando se
dispoña dos medios materiais para iso, poderá acordar tamén a emisión das
vistas mediante sistemas de difusión telemática da imaxe e o son.
·
Exploracións médico-forenses e dos equipos
psicosociais.
Ata o 20 de xuño de 2021 inclusive, os informes médico-forenses poderán
realizarse baseándose unicamente na documentación médica existente á súa
disposición, que poderá ser requirida a centros sanitarios ou ás persoas
afectadas para que sexa remitida por medios telemáticos, sempre que iso for
posible.
·
Atención ao público.
Ata o 20 de xuño de 2021 inclusive, a atención ao público en calquera
sede xudicial ou da fiscalía realizarase por videoconferencia, por vía
telefónica ou a través do correo electrónico habilitado para ese efecto. Todo
iso sempre que sexa posible en función da natureza da información requirida e,
en todo caso, cumprindo o disposto na Lei Orgánica 3/2018, do 5 de decembro, de
Protección de Datos Persoais e garantía dos dereitos dixitais. Para aqueles
casos nos que resulte imprescindible acudir á sede xudicial ou da fiscalía,
será necesario para o público obter previamente a correspondente cita, de conformidade
cos protocolos que para o efecto establezan as administracións competentes, que
deberán prever as particularidades das comparecencias #ante os xulgados en
funcións de garda e os xulgados de violencia sobre a muller.
·
Actuacións dentro dun mesmo centro de destino.
Ata o 20 de xuño de 2021 inclusive, os secretarios coordinadores
provinciais poderán asignar aos letrados da Administración de Xustiza e demais
funcionarios ao servizo da Administración de Xustiza destinados en calquera das
unidades procesuais de apoio directo a órganos xudiciais, a realización de
calquera das funcións que, sendo propias do corpo ao que pertencen, estean
atribuídas a calquera outras unidades.
·
Xornada laboral.
Ata o 20 de xuño de 2021 inclusive, poderanse establecer, para os
letrados da Administración de Xustiza e para o resto de persoal ao servizo da
Administración de Xustiza, xornadas de traballo de mañá e tarde para todos os
servizos e órganos xurisdicionais, previa negociación colectiva coas
organizacións sindicais e respectando en todo caso as medidas de seguridade
laboral e prevención de riscos laborais. O Ministerio de Xustiza e as
Comunidades Autónomas con competencias en materia de Xustiza establecerán a
distribución da xornada e a fixación dos horarios de conformidade co
establecido na Lei Orgánica 6/1985, do 1 de xullo, do Poder Xudicial.
·
Dotación de medios e instrumentos electrónicos
e sistemas de información.
As Administracións competentes en materia de Xustiza dotarán a todos os
órganos, oficinas xudiciais e fiscalías dos medios e instrumentos electrónicos
e dos sistemas de información necesarios e suficientes para poder desenvolver a
súa función eficientemente. Estes sistemas serán plenamente accesibles e
operativos sen necesidade de que os usuarios se atopen fisicamente nas sedes
dos seus respectivos órganos, oficinas ou fiscalías, con respecto ás políticas
internas que garantan o dereito á desconexión dixital recollido no artigo 14.
j.bis e no artigo 88 do texto refundido da Lei do Estatuto Básico do Empregado
Público, aprobado por Real Decreto Lexislativo 5/2015, do 30 de outubro. Así
mesmo, formarán aos integrantes dos mesmos no uso e utilización dos devanditos
medios e instrumentos.
¡¡STAJ esixe a negociación inmediata de todo o que supoña
unha modificación das nosas condicións laborais!!
As medidas máis polémicas son a que afecta os nosos
horarios de traballo, sobre a que non permitiremos que se salten o que
establece a LOPJ, que non se derroga (calquera horario de tarde debe ser
debidamente incentivado, ademais de voluntario) e, sobre todo, a que permite ao
Secretario Coordinador asignarnos un xulgado diferente ao que estamos
destinados, desde STAJ non permitiremos asignacións arbitrarias que supoñan
eludir o que a propia LOPJ establece en canto aos centros de destino, e
impugnaremos calquera decisión que implique mobilidade forzada dos
funcionarios, aínda que sexa no mesmo municipio e xurisdición.