Publícase no dog a RESOLUCIÓN do
20 de abril de 2026, da Dirección Xeral de Xustiza, pola que se resolve
definitivamente o concurso de traslados ordinario para prazas vacantes entre
persoal funcionario dos corpos e escalas de xestión procesual e administrativa,
tramitación procesual e administrativa e auxilio xudicial da Administración de
xustiza, anunciado pola Resolución do 27 de outubro de 2025.
Para o persoal funcionario que
estea en activo ou en servizos especiais e non reingrese en ningún dos corpos
ou escalas a que se refire o presente concurso, non incluíndose nese punto o
persoal funcionario que se encontre reingresado provisional, o cesamento deberá
efectuarse nas datas que a continuación se indican: tramitación procesual e
administrativa, o 8 de maio de 2026,
venres; xestión procesual e administrativa e auxilio xudicial, o 12 de maio de
2026, martes.
Aquel persoal funcionario que
estea desempeñando un posto de traballo en comisión de servizos non será
necesario que se desprace ao órgano xudicial de orixe que teña reservado para
formalizar o cesamento e pode realizalo no órgano en que estea a prestar
servizos, para o cal as xerencias farán chegar os documentos ao órgano en que o
concursante estea desempeñando a comisión. O prazo posesorio que lle
corresponde gozar a este persoal contarase tendo en conta a localidade do posto
que está a desempeñar efectivamente en comisión, non a do que tivese reservado,
e a localidade do obtido no concurso.
A toma de posesión do novo
destino obtido por concurso para o persoal funcionario indicado no punto
anterior producirase nos tres días
hábiles seguintes ao cesamento, se non hai cambio de localidade do persoal
funcionario, ou nos oito días hábiles
seguintes se implica cambio de localidade dentro da comunidade autónoma, e vinte días hábiles seguintes se
implica cambio de comunidade autónoma, con excepción da Comunidade Autónoma de
Canarias, Comunidade Autónoma das Illes Balears, Cidade de Ceuta e Cidade de
Melilla, en que será no mes seguinte, tanto se o posto de traballo nas illas ou
nas cidades é o de orixe como se é o de destino. O cesamento e o cómputo dos
prazos posesorios produciranse cando finalicen os permisos ou licenzas,
incluídos os de vacacións, que fosen concedidos ás persoas interesadas.