O Rexistro Civil de Lugo comeza o 15 de outubro a dar cita previa a través de internet para realizar determinados trámites e evitar, deste xeito, a coincidencia de varias persoas na súa sede e os desprazamentos innecesarios. Lugo convértese así no primeiro rexistro civil de Galicia en poñer en marcha este sistema, ao que se sumarán o resto de rexistros nos vindeiros días de outubro:
- Pontevedra 20/10/2020
- Santiago 22/10/2020
- Ferrol 26/10/2020
- Ourense 28/10/2020
A partires do 1 de novembro será indispensable que a cidadanía obteña quenda para realizar todos estes trámites e descargue e cumprimente a documentación antes de acudir ás instalacións de forma presencial. A través da páxina web www.xustiza.gal, os cidadáns poderán pedir cita e descargar os formularios que deben presentarse para levar a cabo cada un dos trámites. Ademais, nela especificarase a documentación requirida para que a cidadanía se desprace á sede con ela e cos formularios cubertos, o que permitirá axilizar os trámites e evitar visitas innecesarias á sede xudicial