O venres pasado, representantes
de STAJ reunímonos co secretario coordinador da provincia de Pontevedra.
Dende STAJ trasladámoslle que os
protocolos que el mesmo elaborou amósanse pouco efectivos e adecuados para a
coordinación dos distintos servizos comúns e áreas. Insistimos especialmente na
falta de eficacia que xeran e, sobre todo, no enorme desequilibrio de carga de
traballo que se está a producir nalgúns sitios, incluso entre postos de
distintos equipos dentro da mesma área. Instámolo a buscar unha solución
consensuada para este grave problema. STAJ pediulle que modifique os protocolos
reducindo o número de grupos de traballo, modificando tamén as tarefas
asignadas a cada grupo e ampliando o persoal de cada un dos grupos.
Tamén lle pedimos un maior
control e que garantice a coordinación entre os letrados xefes e directores de
cada un das áreas e servizos comúns, co fin de que non se produzan decisións
contraditorias dentro das mesmas áreas. Neste mesmo sentido, pedímoslle que
evite a delegación, moitas veces fraudulenta, de funcións propias dos LAJ aos
funcionarios dos corpos xerais.
Falamos da necesidade dun cambio
da estrutura das novas oficinas para crear máis áreas e equipos estruturais e o
aumento da plantilla en todas as áreas, pois as plantillas actuais son
absolutamente insuficientes para abordar a carga de traballo. O secretario
coordinador amosouse aberto a valorar propor á Dirección Xeral, tal e como xa
fixemos dende STAJ a pasada semana, un cambio para crear máis áreas e quipos
estruturais e cambios nas RPTs, así como a apoiar as nosas solicitudes de
aumento de plantilla e de nomeamento de reforzos de xeito inmediato.
Solicitámoslle que traslade aos
LAJ directores a necesidade de que fagan chegar ao persoal e os seus
representantes os organigramas coa distribución do persoal en cada equipo ou
grupo funcional, con identificación da RPT.
Informounos de que en breve
comezarán xa as reubicacións físicas definitivas do persoal, aínda que parece
difícil que poidan comezar movementos de persoal esta semana de forma
xeralizada, tanto en Vigo como en Pontevedra.