STAJ solicita un reforzo para o xulgado de Arzúa

O Xulgado de Primeira Instancia e Instrución nº1 de Arzúa está a atravesar unha situación especial e particular  que ven dada:

- Pola falta de persoal e medios materiais.

    Ata fai ben pouco, existía unha dotación composta por dous axentes xudiciais (un deles de reforzo) pero foi coma si nada, xa que a compañeira de auxilio xudicial de reforzo tivo que pedir unha baixa que durou máis de catro meses, co resultado da eliminación dese reforzo. Agora mesmo o titular ten que levar ademais das súas funcións (tódolos días atención nas vistas, facelo correo, Arquivo de expedientes, etc...); ter que levar el só a sección do Rexistro Civil.

    Mencionar que se trata dun Partido Xudicial amplo, no que conta con cinco residencias e un sanatorio psiquiátrico das que imos a enumerar: A Residencia San Xosé (Arzúa); a Residencia “Nosa Señora da Magdalena”, “Residencia para maiores” (Boimorto); “Fogar Residencial de Melide” (Melide); a “Residencia Os Tercios S.L” (Touro) e o “Sanatario La Robleda” (O Pino), implicando gran cantidade de expedientes de incapacidade e internamentos, sumádelle as tarefas do Rexistro Civil e os casos relacionados coa violencia de xénero, ao contar cun só xulgado de primeira instancia e instrución que ten que estar de garda tódolos días do ano, tendes como consecuencia un exceso de traballo, que xenera situacións como a acontecida este verán cando o xulgado tivo que suspender as vistas por disfrutar das súas vacacións o axente xudicial provocando o malestar tanto de avogados, procuradores, como dos propios interesados

    Engadir a este cóctel, que unha funcionaria interina de tramitación aprobou recentemente as oposicións e deixará libre esa praza para incorporarse ao seu destino.

  Por outra banda reivindicar a inmediata actualización dos expedientes xudiciais arquivados nas dependencias do Xulgado de Arzúa. Non se trata dun antollo, así sen máis, senón a realidade é que existe:

- Saturación dos depósitos do arquivo e mesmo dentro da oficina xudicial.

- Ademais compróbase con frecuencia que o espazo para instalar documentación vese reducido por utilizarse tamén como destino para pezas de convicción e material ou mobiliario de oficina.

- Acumulación de fondos documentais de gran antigüedade.

    En concreto neste xulgado o arquivo está situado nun ático, con teitos pronunciados onde os estantes mestúranse con armarios onde impera a desorganización dos seus expedientes xudiciais e da súa documentación, sobre todo da máis antiga, e en moitos casos pésimo estado de conservación, ademais como se pode ver na foto os expedientes de penal encóntranse alienados ao longo das escaleiras de acceso ao arquivo.

    Tamén deberíanse enviar a este xulgado medios materiais para a colocación e clasificación dos expedientes xudiciais.

Por todo isto, dende STAJ vemos que as autoridades administrativas teñen a obriga de manter unha salubridade laboral con respecto aos seus  funcionarios públicos, construíndo unhas condicións de traballo axeitadas, xustas, onde os traballador@s poidan desenrolar a súa actividade dignamente. O grao de tensión e as presións que sofren os traballadores e traballadoras deste Xulgado, incluídas Xuíz e Letrado da Administración de Xustiza, pola inxente carga de traballo á que teñen que facer fronte diariamente fan  indignos, inxustos e inadecuados os postos de traballo que ocupan.

STAJ dirixe este escrito exixindo ao Director Xeral de Xustiza para que:

- Nomee con urxencia un funcionario de reforzo pertencente ao corpo de Auxilio Xudicial.

- E para o Arquivo que se dote dun técnico/a superior o medio en arquivos, destinado a garantir a conservación ou ben o expurgo de aqueles expedientes mais antigos. 

Xustificante
Solicitude de Reforzo 

   STAJ, sindicato independente e específico de Xustiza, sen subvencións e sen ataduras