A
tan cacareada modernización da Xustiza non pasa de ser unha mera declaración de
intencións en moitos territorios onde se está implantando. O novo expediente
dixital segue sen funcionar correctamente e en lugar de axilizar a xustiza o
que está a provocar é xustamente o efecto contrario.
Os
problemas están a repetirse en practicamente todas as cidades de ámbito
Ministerio onde se puxo en marcha, como son: Murcia, Cartaxena, Salamanca,
Valladolid, Eivissa, Palencia, Badaxoz, Cáceres, etc.. Esta semana producíronse
cortes de varias horas en todos os xulgados e o mesmo ocorreu a semana pasada
cando o sistema estivo inoperativo entre as 9 e as 12 horas, provocando un
parón que retarda a marcha dos procesos.
Estes
problemas levaron a que algúns Xuíces Decanos, como o de Eivissa, denunciasen
ante a prensa a paralización dos seus xulgados pola caída das plataformas
dixitais, alegando que o "papel 0" e a xustiza electrónica quedan moi ben como
un titular para os políticos, pero a realidade é que é imposible de aplicar
pola falta de medios. Engadindo que "isto non é unha empresa de
subministracións e non se pode cambiar todo da noite ao día" e insistindo
en que os programas de xestión procesual non están preparados para dixitalizar
todo.