Ante o escrito remitido polo STAJ onte no que solicitamos explicación aos ceses nas comisións que se estaban a producir nalgunhas localidades con data de efectos do día 30 de decembro de 2025, a DXX acaba de contestar o seguinte:
"En relación ás consultas sobre os ceses de comisións de servizo pola entrada en funcionamento da nova oficina xudicial, infórmase de que o 11.12.2025 se comunicaron os acordos de continuidade e de cese das comisions afectadas pola Fase III. Así, continúan un total de 15 persoas en comisión de servizo e cesan, con efectos do 30.12.2025, 11 das comisións vixentes neste momento.
O cese das ditas comisións débese á obtención das persoas, ou ben dun posto singularizado ou ben a que a praza na que a persoa desempeña a comisión pasa a ser na mesma unidade na que ten posto definitivo. Por último acordouse o cese no caso de que non existise posto vacante de similar contido ao do posto que ocupaba a persoa en comisión naqueles casos nos que a persoa tiña posto definitivo na mesma localidade."
Este último apartado incluido pola DXX (acordouse o cese no caso de que non existise posto vacante de similar contido ao do posto que ocupaba a persoa en comisión naqueles casos nos que a persoa tiña posto definitivo na mesma localidade) é totalmente contrario ao previsto na normativa de reorganización, que establece que non se cesa nas comisións de servizo e substitucións pola entrada en funcionamento do Tribunal de Instancia e que o persoal en comisión de servizo en prazas vacantes serán asignadas a algunha vacante da localidade.
Esixiremos á DXX que cumpla coa súa propia normativa e que non obrigue a cesar nas comisións de servizo salvo nos casos que establece a regulación.
STAJ, sindicato independente e específico de Xustiza, sen subvencións e sen ataduras
