Na tarde do pasado 26 de xullo celebrouse reunión cos
sindicatos representativos de Xustiza de ámbito nacional coa Ministra de Xustiza Dolores Delgado.
Nesta reunión, de toma de contacto co novo equipo ministerial, STAJ aproveitou
para presentar ante a Ministra as reivindicacións máis importantes dos
funcionarios de Xustiza. Ao mesmo tempo, lembramos que a mesa sectorial de
Xustiza é a única competente para a negociación das condicións de traballo e
salario de TODOS/AS os funcionarios/as ao servizo da Administración de Xustiza,
incluídos os/as LAJ, polo que non imos tolerar que o Ministerio continúe, como
fixo o anterior equipo, negociando melloras coas asociacións de LAJ ás costas
dos sindicatos, e en prexuízo, case sempre, do resto de funcionarios/as de Xustiza.
En materia de reivindicacións, STAJ presentou á
Ministra as seguintes, que consideramos prioritarias:
Promoción
interna. STAJ esixiu que, adicionalmente á
Oferta de emprego 2017-2018, se convoquen procesos de promoción interna
independentes. Existen prazas suficientes para iso, dado que xunto ás
prazas de taxa de reposición produciuse este último ano un incremento no número
de prazas vacantes como consecuencia da creación de novos órganos xudiciais.
Xunto a iso, esiximos ademais recuperación da reserva do cincuenta por cento
para a promoción interna nas ofertas de emprego, e instamos ao Ministerio a
que cambie o rumbo levado polo anterior equipo, que non facía máis que
torpedear o dereito á promoción interna dos funcionarios de Xustiza,
especialmente na promoción ao Corpo de Letrados A. J.
Recuperación
de permisos. Levamos tres anos para recuperar tres
días. A modificación da LOPX neste sentido está parada no Congreso, como
consecuencia das emendas presentadas polo Grupo Popular e que, como lembramos
ao Ministerio, pretenden un maior control político da Administración de Xustiza
e unha nova volta de torca aos dereitos dos funcionarios de Xustiza. Entre
outras cuestións, STAJ deixou claro que non vai admitir a simplificación dos
centros de destino pretendida nesas emendas (pretenden que o centro de destino
sexa o municipio, sen distinción de xurisdicións, servizos comúns, UPAD,
Fiscalías, IML, etc…) que podería supoñer unha mobilidade ao antollo do/da xefe/a de
quenda.
Solución
política definitiva aos problemas de falta ou erros de cotización á Seguridade
Social. Moitos/as compañeiros/as xa están a padecer
este despropósito nas súas pensións de xubilación, pola omisión inconcibible
das cotizacións por parte do Ministerio no seu momento.
Negociación
da reforma da Lei do Rexistro Civil,
que permita o seu mantemento dentro da Administración de Xustiza, público e
gratuíto, con plenas competencias, con mesma demarcación actual e servido
enteira e exclusivamente por funcionarios/as de Xustiza.
Extensión
do complemento de produtividade a todos/as e non só para xuíces e letrados. Non é de recibo que o resto de funcionarios/as non
perciba nin un só euro por unha produtividade que depende directamente do seu
traballo.
Revisión
das retribucións básicas,
para a recuperación dos niveis de soldo base, trienios e complemento xeral
de posto existentes antes da rebaixa xeneralizada imposta en 2010, tamén
pedimos unha revisión do complemento
polo servizo de garda, singularmente das gardas de permanencia e de dispoñibilidade
semanais e de 8 días.
Solución
aos problemas que están a xerar a
implantación da Oficina Xudicial e Fiscal e a “Xustiza Dixital”.- É
preciso para iso que, en primeiro lugar, se recoñezan os erros para, unha vez
identificados, poder solucionalos.
A Ministra mostrouse receptiva ás nosas
reivindicacións pero, lamentablemente, e salvo recoñecer os problemas da
Xustiza Dixital e a necesidade de reformas na Administración de Xustiza, non
percibimos que mostrase compromiso algún de mellorar as cousas, especialmente
en materia retributiva, escudándose nas dificultades que teñen en materia de
gasto. Sí se comprometeu a remover os obstáculos para permitir a
recuperación plena do permiso de asuntos propios, anunciando que antes de final
de ano recuperámolo…
Dende logo, STAJ non vai permitir que se incrementen
as retribucións a outros colectivos (Xuíces, Fiscais), como se está anunciando,
mentres que ao resto de funcionarios póñensenos escusas para non negociar
ningunha mellora.
STAJ, sindicato independente e específico de Xustiza, sen subvencións e sen ataduras.